एजेन्सी– सिरियामा आतंकवादी संगठन इस्लामिक स्टेटका तर्फबाट लड्ने जर्मन लडाकुलाई स्वेदश फर्किने पूर्ण हक रहेको जर्मन सरकारको आन्तरिक मामिला मन्त्रालयका प्रवक्ताले जनाएका छन् ।

जर्मनीको आन्तरिक मामिला मन्त्रालयका प्रवक्ताले आफ्नो नियमित पत्रकार सम्मेलनका क्रममा इस्लामिक स्टेटका जर्मन लडाकुलाई स्वदेश फर्किने नैसर्गिक अधिकार रहेको जनाएका हुन् ।

अमेरिकी राष्ट्रपति डोनाल्ड ट्रम्पले युरोपेली मुलुकहरुलाई इस्लामिक स्टेटका तर्फबाट लड्ने आफ्ना नागरिकहरुलाई स्वदेश लैजान र उतै कानूनी कारवाहीको प्रकृया सुरु गर्न आह्वान गरेको केही दिनलगत्तै जर्मन सरकारको यस्तो भनाइ आएको हो ।

गत ६ वर्षयता युरोपबाट हजारौँ लडाकुहरु सिरियामा इस्लामिक स्टेटमा भर्ना हुन पुगेका थिए । अधिकांश युरोपेली लडाकु युद्धमैदानमा मारिएको बताइएपनि अझै ८ सय भन्दा धेरै युरोपेली लडाकुहरु जीवितै रहेको बताइएको छ ।

यता युरोपमा भने इस्लामिक स्टेटका लडाकुलाई स्वदेश फिर्ता ल्याउन हुने वा नहुने विषयमा चर्को बहस छेडिएको छ ।