नयाँ दिल्ली– अन्तिम समयमा आएर स्थगित गरिएको भारतको चन्द्र अभियान चन्द्रयान–२ को प्रक्षेपण आगामी सोमबार हुने भएको छ । भारतीय अन्तरिक्ष अनुसन्धान संस्था (इसरो) ले आगामी सोमबार अपराह्न २ बजेर ४३ मिनेटमा चन्द्रयान–२ को प्रक्षेपण गर्ने घोषणा गरेको हो ।

दक्षिण भारतको आन्ध्र प्रदेशस्थित श्रीहरिकोटाबाट उक्त यान प्रक्षेपणको तयारी गरिएको इसरोले जनाएको छ ।

अघिल्लो साता गत असार ३० गते चन्द्रयान–२ प्रक्षेपण गर्नु केही समयअघि प्राविधिक गड्बडी देखिएपछि प्रक्षेपण स्थगित गरिएको थियो । चन्द्रयानमा देखिएका सबै प्राविधिक समस्या समाधान भइसकेको र निर्धारित समयमा नै प्रक्षेपणका सम्पूर्ण तयारी भएको इसरोले जनाएको छ ।

भारतले चन्द्रमामा भूउपग्रह अवतरण गराउने महत्वाकांक्षी अभियान सफल बनाउन केही वर्षदेखि प्रयास गरिरहेको छ । रुस, संयुक्तराज्य अमेरिका र चीनले यस्तो सफलता प्राप्त गरिसकेका छन् ।

भारतले यस परियोजनामा करिब १४ करोड अमेरिकी डलर खर्चिएको छ । अन्तरिक्ष विज्ञानका क्षेत्रमा यो हालसम्मकै सबैभन्दा सस्तो अभियान मानिएको छ ।