काठमाडौं– बौद्धमा रहेको समता अस्पतालका सञ्चालक उत्तम सञ्जेल सहित ४ जनालाई प्रहरीले पक्राउ गरेको छ । मंगलबार बिहान अस्पतालमा सरसफाइको काम गर्ने २७ वर्षीया विमला तामाङ अस्पतालको शौचालयमा झुन्डिएको अवस्थामा भेटिएपछि प्रहरीले अस्पताल संचालक सञ्जेलसहित ४ जनालाई पक्राउ गरेको हो ।

सोमबार बेलुका अस्पतालबाट घर नफर्किएपछि तामाङको खोजी गर्ने क्रममा मंगलबार बिहान अस्पतालकै शौचालयमा शव भेटिएको थियो। अस्पतालमा झुन्डिएको अवस्थामा शव फेला परेपछि आक्रोशित मृतकका आफन्तले अस्पतालमा तोडफोड समेत गरेका छन् ।

घटनाको विषयमा थप अनुसन्धान गर्न  प्रहरीले अस्पतालका संचालक सञ्जेल, उनकी पत्नि र अन्य दुई जना कर्मचारीलाई नियन्त्रणमा लिएको जनाएको छ। घटनाको विषयमा थप अनुसन्धान भइरहेको प्रहरी वृत्त बौद्धले जनाएको छ ।