काठमाडौं– नेपाली कांग्रेसका सभापति शेरबहादुर देउवाले मंगलबारको बैठकमा आफूलाई बोल्न नदिइएको बताएका छन् ।

मंगलबारको बैठकमा प्रधानमन्त्रीभन्दा पहिले बोल्नका लागि प्रमुख प्रतिपक्षी दलको नेताका रुपमा आफूले समय मागेपनि बोल्न नदिइएको बताएका हुन् ।

आफूलाई बोल्न नदिइएपछि संसद बैठक अवरुद्ध गरिएको देउवाको भनाइ थियो ।

मंगलबारको संसद बैठक अवरुद्ध भएपछि संसद भवन परिसरमा सञ्चारकर्मीसँग कुरा गर्दै देउवाले भने, ‘ “प्रधानमन्त्रीले बोल्ने होइन । जवाफ दिने हो । पहिले बोलिसकेपछि के बोल्ने मैले ? बोल्ने भए हिजो पनि बोल्थे नि, प्रधानमन्त्रीलाई सुनाउनु थियो आज ।’

संसदमा बोल्नका लागि पहिलो प्राथमिकता प्रमुख प्रतिपक्षीलाई दिइनुपर्ने पनि देउवाको भनाइ छ । ‘जहाँपनि विपक्षीले पहिले बोल्ने हो । जवाफ प्रधानमन्त्रीले दिने हो,’ देउवाले भने, ‘ सुरुमा कहाँ बोल्छन् ?’