काठमाडौं– प्रधानमन्त्री केपी शर्मा ओलीले सम्बोधन गर्ने भनिएको मंगलबारको प्रतिनिधिसभा बैठक स्थगित भएको छ ।

प्रमुख प्रतिपक्षी दल नेपाली कांग्रेसको अवरोधका कारण बैठक स्थगित भएको हो ।

बैठक शुरु भएको घोषणा गर्नासाथ कांग्रेसका सांसदहरुले उठेर विरोध जनाएका थिए । आफूहरुले बैठकको प्रारम्भमै बोल्न पाउनुपर्ने भन्दै कांग्रेस सांसदले समय माग गरेका थिए ।

तर, सभामुख कृष्णबहादुर महराले प्रारम्भमै प्रधानमन्त्री ओलीलाई बोल्नका लागि समय दिए ।  सभामुखले बोल्नका लागि समय दिएपछि प्रधानमन्त्री ओली रोस्टमतर्फ गएका थिए । तर, कांग्रेस सांसदहरु विरोध गर्दै रोस्टम नै घेर्न पुगे ।

बैठक शुरु भएको करिब ९ मिनेटसम्म कांग्रेसको विरोध जारी रहेपछि सभामुख महराले बैठक स्थगित भएको घोषणा गरे ।

प्रतिनिधिसभाको अर्को बैठक बुधबार विहान ११ बजे बस्ने गरी सभामुख महराले मंगलबारको बैठक स्थगित भएको घोषणा गरेका हुन् ।