काठमाडौं–पाल्पाको रिब्दिकोट गाउँपालिका भवनमा बम विस्फोट भएको छ । विस्फोटबाट गाउँपालिकाको भवनमा सामान्य क्षति पुगेको छ ।

गाउँपालिकको वडा नम्बर ३ को वडा सचिव बस्ने कोठा छेऊमा विस्फोट गराइएको छ । विस्फोटबाट एक थान कम्प्यूटर, तीन तल्लाको अगाडी भागको झ्यालका सिसा फुटेको, एउटा झ्यालको चौकस, भवन अगाडीको ट्रस ध्वस्त भएको र भवनको ग्राहोसमेत केही चर्किएको गाउँपालिका प्रवक्ता विष्णु खनालले जानकारी दिए ।

राति साढे १ बजे विस्फोट भएको स्थानीयहरुले बताएका छन् । मोटरसाइकलको टायरमा बनाइएको सुतली बम पड्काएरको प्रराम्भीक अनुसन्धानबाट खुलेको छ भने शंकास्पद एक जनालाई प्रकाऊ गरिएको जिल्ला प्रहरी कार्यालयले जनाएको छ ।

त्यस्तै बागलुङको बागलुङ नगरपालिकामा पनि पाइप बम फेला परेको छ । बम डिस्पोजका लागि नेपाली सेनाको टोली त्यसतर्फ लागेको प्रहरीले जनाएको छ ।

नेत्र विक्रम चन्द विप्लवका गतिविधिलाई सरकारले प्रतिबन्ध लगाएपछि विप्लव समूहले विभिन्न आन्दोलन गर्ने घोषणा गरेको थियो । सोही आन्दोलन अन्तर्गत बम राखिएको हुनसक्ने आशंका गरिएपनि अहिलेसम्म बम विस्फोटको जिम्मा कसैले लिएको छैन् ।

विप्लव समूहले आफूहरुमाथि लगाएको प्रतिबन्ध फुकुवा गर्न सरकारसँग माग गर्दै नभए कडा आन्दोलन गर्ने चेतावनी दिँदै आएको छ ।
विप्लव समूहमाथि निक्कै आक्रमक बनेको सरकारले विभिन्न गतिविधिमा संलग्न विप्लवका नेता तथा कार्यकर्तालाई पक्राउ पनि गरेको छ।

यसैबीच पूर्वीनवलपरासीको देवचुलीस्थित चौधरी ग्राम उद्योगमा हिजो (बुधबार) बम विस्फोट भएको छ । बोत्तलमा बारुद भरेर उद्योग भित्र फालिएको र सोही बारुद भएको बोत्तल विस्फोट भएको जिल्ला प्रहरी कार्यालय नवलपरासी (पूर्वी) का डीएसपी रमेश थापाले जानकारी दिए ।
विस्फोटबाट ठूलो क्षति भएको छैन। घटनाको अहिलेसम्म कसैले जिम्मा लिएको छैन ।