बर्दिया–  सरकारी जग्गा किर्ते गरेको आरोपमा बर्दियाको भुमिसुधार तथा मालपोत कार्यालयका दुई कर्मचारी पक्राउ परेका छन ।

बर्दियाको साविक नेउलापुर गाविसको सरकारी जग्गालाई किर्ते गरेर बाँकेको नेपालगन्ज उपमहानगरका एक व्यक्तिको नाममा नामसारी गरेको आरोपमा भूमिसुधार तथा मालपोत कार्यालयका नायव सुब्बा कृष्णलाल शर्मा र खरिदार भूमीराज पोख्रेल पक्राउ परेका हुन् ।

बर्दियाका प्रमुख जिल्ला अधिकारी रामबहादुर कुरुम्बाँगका अनुसार सरकारी कागज किर्ते मुद्धामा दुईजना कर्मचारी पक्राउ परे पनि कार्यालयका प्रमुख कृष्णप्रसाद ज्ञवाली फरार रहेका छन् ।

बाँके जिल्लासंग जोडिएको घटना भएकोले थप अनुसन्धानका लागि नासु शर्मा र खरिदार पोखरेललाई नेपालगन्ज लगिएको छ ।

यसैबीच, राजविराजको एक होटलमा सेवाग्राहीसँग घुस लिदैं गरेको अवस्थामा अख्तियारको टोलीले नापी कार्यालयका एक कर्मचारीलाई सोमबार नियन्त्रणमा लिएको छ ।

नापी कार्यालय राजविराजको जन्जिरदार पदमा कार्यरत पिन्टुकुमार यादवलाई सेवाग्राहीसँग २६ हजार लिदैं गरेको अवस्थामा पक्राउ गरिएको अख्तियार दुरुपयोग अनुसन्धान आयोगले जनाएको छ ।