नेदरल्याण्ड्स– नेदरल्याण्ड्सको पूर्वी भेगमा रहेको युट्रेक्ट शहरमा गोली चल्दा कम्तीमा एक जनाको मृत्यु भएको पुष्टि भएको छ । युट्रेक्ट शहरको ट्राममा एकजना बन्दुकधारीले जथाभावी गोली चलाएको अधिकारीले जनाएका छन् । घटनामा अरु केही घाइते भएका छन् ।

स्थानीय समयअनुसार बिहान पौने ११ बजे युट्रेक्ट शहरको २४ अक्टोबरप्लेन क्षेत्रको ट्राम जंसनमा बन्दुकधारीले गोली चलाएको बताइएको छ ।
घटना भएको क्षेत्रलाई प्रहरीले सिल गरेको र सर्वसाधारणलाई सुरक्षित रुपमा आफ्नो घरभित्रै रहन आह्वान गरेका छन् ।

संदिग्ध बन्दुकधारी फरार रहेको र बन्दुकधारीको खोजी भइरहेको प्रहरीको भनाइ छ । बन्दुकधारीले गोली चलाउनुको कारणबारे केही थाहा हुन सकेको छैन । यद्यपि प्रहरीले घटना आतंकवादसँग सम्बन्धित रहे नरहेकोबारे अनुसन्धान गरिरहेको छ ।

डच प्रधानमन्त्री मार्क रुटले घटनाबारे चासो व्यक्त गर्दै साप्ताहिक बैठक स्थगित गरेको जनाएका छन् ।