पोखरा– आगामी हप्तादेखि शुरु हुने माध्यमिक शिक्षा परीक्षा (एसइई) मा सहभागि हुने महिला परीक्षार्थी (छात्रा)हरुका लागि निःशुल्क सेनेटरी प्याडको व्यवस्था मिलाइएको छ ।

परीक्षाको समयमा महिनावारी हुने छात्रालाई लक्षित गरी गण्डकी प्रदेश सरकारले आफ्नो प्रदेश मातहतका सबै परीक्षा केन्द्रमा सेनेटरी प्याडको व्यवस्था गर्न लागेको हो ।

गण्डकी प्रदेशको सामाजिक विकास मन्त्रालयले सबै परीक्षा केन्द्रका महिला शौचालयमा उपलब्ध हुने गरी सेनेटरी प्याडको व्यवस्था गर्न लागेको हो ।

मन्त्रालयले कूल महिला परीक्षार्थीको १५ प्रतिशतका लागि सेनेटरी प्याड खरिद गर्न लागेको हो ।

मन्त्रालयले गरेको अध्ययनका क्रममा यसअघिका परीक्षाहरुमा सहभागी हुने महिला परीक्षार्थीमध्ये १५ प्रतिशत परीक्षार्थी परीक्षाको समयमा महिनावारी हुने देखिएपछि सोहीअनुसार सेनेटरी प्याडको व्यवस्था गर्न लागिएको हो ।

गण्डकी प्रदेशमो एसइई परीक्षाका लागि २ सय १७ वटा परीक्षा केन्द्र तोकिएको छ । मन्त्रालयले सबै परीक्षा केन्द्रमा सेनेटरी प्याड राख्ने जनाएको छ ।