काठमाडौं – नयाँ वर्षको अवसर पारेर यही चैत्र २९ गतेदेखि रिलिज हुन लागेको फिल्म ‘ए मेरो हजुर ३’ को शीर्ष गीत सार्वजनिक गरिएको केही घण्टामै ट्रेन्डिङ नम्बर एकमा पुगेको छ । अनमोल केसी र सुहाना थापाको जोडी रहेको फिल्मको उक्त गीत बुढासुब्बा डिजिटलमार्फत सार्वजनिक गरिएको थियो ।

‘जिन्दगी नै भन्दिन’ बोलको उक्त गीतमा रोमान्टिक प्रेमलाई प्रस्तुत गरिएको छ । गीतका शब्दलाई एकनारायण भण्डारीले लेखेका हुन् भने आशिष अविरलले संगीत दिएका छन् । यस्तै स्वरमा सुगम पोखरेल र प्रविशा अधिकारीले साथ दिएका छन् ।

भिडियोको कुरा गर्नुपर्दा अनमोल र सुहानाको जोडी सुहाएको छ । युट्युब प्रयोगकर्ताले अनमोल र सुहानाको जोडी सुहाएको प्रतिक्रिया दिएका छन् । फ्यानले आफू फिल्मको प्रतीक्षामा रहेको बताएका छन् ।

सुहाना इन्टरटेनमेन्टको ब्यानरमा निर्माण भएको यो फिल्मलाई सुनीलकुमार थापाले निर्माण गरेका हुन् भने झरना थापाले निर्देशन गरेकी हुन् ।

यसअघि झरनाले निर्देशन गरेको फिल्म ‘ए मेरो हजुर २’ पनि दर्शकले रुचाएका थिए ।