काठमाडौं– मालपोत कार्यालय पर्साका तत्कालीन फाँटवाल मदन प्रसाद गुप्ताविरुद्ध ७७ लाख ८६ हजार रुपैयाँको भ्रष्टाचार मुद्दा दायर भएको छ ।

फाँटवाल गुप्ताले २०७०/०७१ को रजिष्ट्रेशन फाँट (ख)मा लिखित पास गर्दा लाभकर नलिएको, एउटै नम्बर राखी विभिन्न रजिस्ट्रेसन पास गरेको, लिखित रजिस्ट्रेशनमा भएको थैली रकम घटाइ कम मूल्यको थैली कायम गरी रकम हिनामिना गरेको भन्दै अख्तियार दुरुपयोग अनुसन्धान आयोगमा उजुरी परेको थियो ।

उक्त उजुरीमाथि छानबिन गर्ने क्रममा गुप्ताले उठाएको राजश्व प्रचलित कानून बमोजिम समयमै दाखिला नगरी हिनामिना गर्ने तथा महत्वपूर्ण सरकारी अभिलेख कागजात र प्रमाणहरु नष्ट गर्ने गरेको पृष्टि हुन आएको अख्तियारले जनाएको छ ।

गुप्ताले सरकारी प्रमाण नस्ट गरेको तथा राजश्व रकम हिनामिना गरेको अभियोगमा अख्तियार दुरुपयोग अनुसन्धान आयोगले सोमबार उनीविरुद्ध विशेष अदालतमा मुद्दा दायर गरेको छ ।

अख्तियारले गुप्ताविरुद्ध ७७ लाख ८६ हजार ८ सय १६ रुपैयाँ बिगो तथा बिगो अनुसारको जरिवाना र अधिकत्तम ९ वर्षसम्म कैद सजाय मागदाबी गरेको छ ।