काठमाडौं – बलिउड अभिनेता रणवीर कपूरको साथी भएर अभिनय गरिसकेका छन् भोलाराज सापकोटाले । भोलाराजले अभिनय गरेको हिन्दी चलचित्र ‘बर्फी’ ले बलिउडमा मात्र होइन, नेपालमा पनि खुबै चर्चा कमायो ।

यो लभस्टोरी फिल्ममा भोलाराजले रणवीर कपूर उर्फ बर्फीको घनिष्ट साथीको भूमिका निभाएका छन् । यता प्रदर्शनका क्रममा रहेको फिल्म ‘चच हुई’ मा उनी आर्यन सिग्देलको घनिष्ट साथीका रुपमा देखिँदैछन् ।

भोला सुनाउँछन्, ‘यी दुवै फिल्ममा म मिल्ने साथीको भूमिमामा छु, बर्फीमा जस्तै यो फिल्ममा पनि म साथीकै समर्थनमा बोल्छु ।’

फिल्ममा साथीकै रुपमा देखिन लागे पनि भोलाले ‘चच हुई’ को चरित्र ‘बर्फी’ को चरित्रसँग नमिल्ने बताए । उनले यो फिल्मको पृष्ठभूमिले चरित्रलाई फरक बनाइदिएको समेत खुलाए ।

‘दुवै फिल्ममा काम गर्दा मजा आयो, उहाँ (छेउमा बसेका साम्तेन भुटिया) सँग पनि पहिलेदेखि कै चिनजान थियो, उहाँको कामबाट प्रभावित थिएँ, शूटिङका बेला रमाइलो भयो,’ भोलाराजल सम्झे ।

नजिकै बसेका निर्देशक साम्तेन भुटियाले पनि भोलाराजलाई ‘बर्फी’ हेरेदेखि नै उनको अभिनय मन पराएको प्रतिक्रिया दिए । उनले भने, ‘बर्फी हेरेपछि धेरैले भोलाराज दार्जिलिङकै हो भनिरहेका थिए, मैले पूरै दार्जिलिङ खोजेँ तर भेट्याउन सकिनँ ।’

पछि काठमाडौं आएपछि भोलाराजसँग भेट भएको र काम गर्ने अवसर जुरेको उनले सुनाए ।

यो फिल्ममा भोलाराजले आर्यन सिग्देलको साथीको भूमिका निभाएका छन् । कमेडी शैलीको यो फिल्ममा भोलाराज र आर्यनलाई कमेडी शैलीमा देख्न सकिन्छ । फिल्ममा मिरुना मगर, माओत्से गुरुङ लगायतको पनि अभिनय रहनेछ ।

‘चच हुई’ निर्देशक साम्तेनका लागि पनि फरक प्रयास हो । किनकि, यो फिल्मलाई साम्तेनले व्यावसायिक रुपमा सफल बनाउने ‘ट्राइ’ गरिरहेका छन् । यसअघि साम्तेनले निर्देशन गरेका ‘अनागत’, ‘तान्द्रो’ लगायतका फिल्म व्यावसायिक रुपमा असफल भए पनि चर्चा पाएका थिए ।

उनको निर्देशनमा बनेको फिल्म ‘सुस्केरा’ पुसमा रिलिज हुँदैछ । फिल्म ‘चच हुई’ भने मंसिर ६ देखि प्रदर्शनमा आउँदैछ ।