काठमाडौं- काठमाडौं क्विन्सले वुमेन च्याम्पियन्स लिग (डब्लुसीएल) मा सुखद् शुरुवात गरेको छ । बिहीबार बिहान भएको खेलमा पोखरा पल्टनलाई ८२ रनले पराजित गर्दै काठमाडौंले पहिलो जित हात पारेको हो ।

त्रिभुवन विश्वविद्यालयको क्रिकेट मैदानमा काठमाडौंले दिएको १५३ रनको विशाल लक्ष्य पछ्याएको पोखरा १६ ओभर ५ बलमा सबै विकेट गुमाएर ७० रन मात्रै बनाउन सक्यो ।

पोखराका लागि कप्तान सिता राना मगरले १७ तथा बिन्दु रावलले १३ रन जोडिन । अन्य खेलाडीले दोहोरो अंक जोड्न सकेनन् ।

पोखरालाई सस्तैमा समेट्न काठमाडौंकी सरस्वती कुमारी र अप्सरी बेगमले समान २–२ विकेट लिईन् । यसअघि टस हारेर पहिले ब्याटिङ गरेको काठमाडौंले २० ओभरमा ५ विकेट गुमाएर १५२ रन बनाएको थियो ।

काठमाडौंको लागि कप्तान रुबिना क्षेत्रीले नटआउट ८३ रनको अर्धशतकीय इनिङ्स खेलेकि थिइन् । उनले ६७ बलको सामना गर्दै १४ चौका र २ छक्का प्रहार गरिन् ।

यस्तै काठमाडौंका लागि रोमा थापाले १९, सोभा आलेले १२ तथा ईश्वरी बिष्टले अविजित १० रन प्रहार गरिन् । काठमाडौंविरुद्ध पोखराकी अनुराधा चौधरीले ४ तथा कविता कुँवरले १ विकेट लिईन् ।

जितसँगै काठमाडौंले २ खेलमा २ अंक जोडेको छ । पहिलो खेलमा काठमाडौं बुधबार चितवनसँग ५ विकेटले पराजित भएको थियो ।