काठमाडौं- विश्वस्तरीय संयुक्त सैन्य अभ्यास ‘क्याब्रियन पट्रोल–२०१९’ मा नेपाली सेनाले स्वर्ण पदक हात पारेको छ ।

गत असोज ६ गते  बेलायत प्रस्थान गरेको प्रमुख सेनानी अशिम देव गुरुङको नेतृत्वको १० जनाको सैनिक टोलीले स्वर्ण पदक जितेको हो ।

गुरुङको नेतृत्वमा गएको नेपाली टोलीमा विशेष फौज बाहिनी, पशुपतिप्रसाद गण र गौरीबक्स गुल्मका सदस्यहरु सहभागी थिए ।

‘युद्धकालीन विशेष परिस्थितिको कल्पना गरेर शत्रुपक्षको गतिविधि समेत समेटेर सञ्चालन गरिने क्याब्रियन पट्रोल अभ्यासमा सहभागी हुने टोलीको शारीरिक सहिष्णुता र पेशागत दक्षताको मुल्याङ्कन गरिन्छ ।

कठिन भौगोलिक इलाकामा सञ्चालन हुने यस अभ्यासमा सहभागीले २ दिनभित्रमा हतियार तथा करिब ५० पौण्ड तौल बराबरको उपकरण एवं बन्दोबस्ती सामग्रीसहित लगभग ५० किलोमिटर दूरी पार गर्नुपर्ने हुन्छ ।

सहभागी टोलीको लडाईँका लागि तयारी, नक्सा र कम्पासको भरमा उनीहरूले दिन र रातमा गर्ने निर्धारित स्थानसम्मको यात्रा, खोला तथा अन्य अवरोध पार गर्ने क्षमता, खबर सङ्कलन, घाइते–बिरामीको व्यवस्थापन, विस्फोटक पदार्थ पत्ता लगाउने क्षमता लगायत रसायनिक, जैविक र आणविक हतियार प्रहार भएको अवस्थामा अपनाउने सतर्कता समेतका दक्षता परिक्षण गरिन्छ ।

२४ असोजबाट शुरु भएको सो अभ्यास संयुक्त अधिराज्यको वेल्स, ब्रेकनमा भएको थियो । नेपालसहित ३४ देश र बेलायती फौजका १०६ समेत गरी १४० जना सैन्य टोलीको सहभागीता रहेको थियो । यस किसमको अभ्यास नेपाली सेनाले २०१४ बाट भाग लिँदै आएको छ ।