काबुल– ३० जनाको ज्यान जानेगरी अफगानिस्तानमा गराइएका दुई बम विष्फोटको जिम्मा इस्लामिक लडाकु समूह तालिबानले लिएको छ ।

मंगलबार अफगानिस्तानको परवान प्रान्तको राजधानी चारिकर शहरमा राष्ट्रपति अशरफ घानी सहभागी रहेको चुनावी र्‍याली नजिकै गराइएको विष्फोटमा २४ जनाको ज्यान गएको थियो । यस आक्रमणमा ३१ जनाभन्दा धेरै घाइते भएका थिए । आक्रमणमा राष्ट्रपति घानी भने सुरक्षित रहेको अधिकारीले जनाएका छन् ।

त्यस्तै, मंगलबारै राजधानी काबुलमा गराइएको अर्को बम विष्फोटमा ६ जना मारिएका थिए । आक्रमणमा अरु १४ जना घाइते भएका थिए ।तालिबानले विज्ञप्ति जारी गर्दै दुबै आक्रमणको जिम्मा लिएको हो ।

विज्ञप्तिमा तालिबानले पटक–पटक मानिसहरुलाई चुनावी र्‍यालीमा नजान उर्दी जारी गरेकाले आक्रमणका पीडितहरु आफ्नो अवस्थाका लागि आफैं जिम्मेवार रहेको जनाएको छ ।

अफगानिस्तानमा ११ दिनपछि हुने राष्ट्रपतीय निर्वाचनको मिति नजिकिँदै गर्दा तालिबानले चुनावी समारोहलाई लक्षित गरी आक्रमणलाई बढाउने आशंका गरिएको छ ।