काठमाडौं– वायुसेवा सञ्चालक संघ, नेपाल (आयोन) ले लुक्लाबाट काठमाडौं आउने क्रममा मंगलबार बिहान काभ्रेको पाँचखाल र सिन्धुलीको नेपालथोकमा अवतरण गरिएको हेलिकोप्टर ‘आकस्मिक’ नभई ‘सुरक्षित’ भएको बताएको छ ।

लुक्लाबाट काठमाडौं आउने क्रममा मौसम प्रतिकूल भएपछि चारवटा हेलिकोप्टर काभ्रेको पाँचखालमा र तीन वटा हेलिकोप्टर सिन्धुलीको नेपालथोकमा सुरक्षित अवतरण गरिएको आयोनको जनाएको छ ।

उडान तथा अवतरण सम्बन्धित सुरक्षित सञ्चालनकै प्रक्रिया अनुसार यसरी अवतरण भएको आयोनका प्रवक्ता योगराज कँडेल (शर्मा)ले बताए ।

उनले भने, ‘आज भएका हेलिकप्टरको उडान तथा अवतरण आकस्मिक नभई सुरक्षित उडान तथा अवतरण भएको र यसलाई हेलिकप्टरको प्रक्रियागत सामान्य उडान तथा अवतरणका रुपमा लिइदिनु हुन सम्बन्धित सबैमा हार्दिक अनुरोध गर्न चाहन्छु।’