काठमाडौं – नेपालका ब्याडमिन्टन खेलाडी प्रिन्स दाहालले जुनियर तर्फको विश्व वरियतामा छलाङ मारेका छन् ।

विश्व व्याडमिन्टन संघले मंगलबार सार्वजनिक गरेको नयाँ वरियता अनुसार प्रिन्स ५४ औं स्थानमा उक्लिएका हुन् । यसअघि प्रिन्सको बरियता जुनियरतर्फ १०३ औं स्थानमा थियो । यो नै नेपाली खेलाडीको जुनियरतर्फको अहिलेसम्मको माथिल्लो वरियता हो ।

उनले दुबई जुनियरमा देखाएको प्रदर्शनका आधारमा उनको बरियता सुधार भएको हो । यु–१९ दुबई इन्टरनेसनल सिरिज २०१९ मा स्वर्ण पदक जितेका थिए ।

प्रिन्सले फाइनलमा बरुण कपुरलाई २१–१९ र २१–१९ को स्कोरमा पराजित गर्दै उपाधि उचालेका थिए । त्यस्तै, सानीया चन्द र प्रिन्सको जोडीले डबल्समा रजत पदक हात पारेका थिए ।