काठमाडौं – चलचित्र विकास बोर्डका अध्यक्ष केशव भट्टराईले नेपालमा पनि चिनियाँ चलचित्रको बजार खोज्न सकिने धारणा राखेका छन् । मंगलबार राजधानीमा भएको ‘चाइना फिल्म फेस्टिभल’ को उद्घाटन समारोहका क्रममा बोल्दै उनले यस्तो धारणा राखेका हुन् ।

उनले चिनियाँ चलचित्र उद्योगले विश्वमा छुट्टै परिचय स्थापना गरिसकेको र चिनियाँ चलचित्रको उत्कृष्ट बजार व्यवस्थाबाट नेपालीले पनि धेरै कुरा सिक्न सक्ने धारणा समेत राखे ।

‘चिनियाँ चलचित्रको उत्कृष्ट बजार व्यवस्थाबाट हामीले धेरै कुरा सिक्न सक्छौँ,’ अध्यक्ष भट्टराईले भने, ‘नेपाली चलचित्रलाई पनि चिनियाँ बजारमा पु–याउन सकिन्छ र नेपालमा पनि चिनियाँ चलचित्रको व्यावसायिक बजार खोज्न सकिने सम्भावना देखेको छु ।’

उनले चीन र नेपालको सांस्कृतिक महत्त्व रहेको भन्दै तीन दिनसम्म चल्ने चिनियाँ फिल्म फेस्टिभलको सफलताको शुभकामना दिए ।

गणतान्त्रिक चीन घोषणाको ७० वर्ष पुगेको अवसरमा चिनियाँ फिल्म फेस्टिभलको आयोजना गरिएको हो । सो अवसरमा ६ चिनियाँ फिल्म स्किृनिङ गरिने कार्यक्रम छ ।