एजेन्सी– विश्वव्यापी रुपमा चर्चित गुगल सर्चन ईन्जिनको गुगल म्यापलाई चुनौति दिँदै चिनियाँ टेक कम्पनी हुवावेले आफ्नै म्यापिङ सर्भिस (सेवा) सार्वजनिक गर्ने तयारी गरेको छ । यसलाई ‘म्याप किट’ नामबाट सार्वजनिक गरिने अन्तर्राष्ट्रिय सञ्चारमाध्यमले उल्लेख गरेका छन् ।

सबैभन्दा पहिले आम प्रयोगकर्ताका लागि भन्दा पनि डेभलपर्सहरुका निम्ती यो सेवा सञ्चालनमा ल्याउने कम्पनीको तयारी छ । यसबाट सेवामा भएका कमिकमजोरी पत्ता लागुन् र आम प्रयोगकर्तामाझ जानु अघि नै सुधार गरौँ भन्ने उद्देश्य लिइएको छ ।

समाचारअनुसार यस सेवाबाट डेभलपर्सलाई स्ट्रिट नेभिगेशन सिस्टमका साथै रियल टाइम ट्राफिकको जानकारी प्राप्त हुनेछ । यो सेवालाई आगामी अक्टोबरमा सार्वजनिक गरिने छ । कम्पनीले पछिल्लो हप्ता मात्रै आफ्नो अपरेटिङ सिस्टम ‘हार्मोनी’ सार्वजनिक गरेको थियो ।

हुवावेले सञ्चालनमा ल्याउन लागेको म्यापिङ सेवाले विश्वका १ सय ५० भन्दा बढी मुलुकलाई समेट्ने छ । यसका साथै यो सेवा ४० भन्दा बढी भाषामा उपलब्ध हुने समाचारमा उल्लेख छ ।