काठमाडौं– सत्तासीन दलका नेता कार्यकर्ताको दबाबमा गायक पशुपति शर्माको गीतलाई युट्युबबाट हटाइएको भन्दै विवेकशील नेपाली पार्टीले आपत्ति जनाएको छ ।

शर्माको ‘लुट्न सके लुट कान्छा’ बोलको गीतलाई हटाउन लगाइनु लोकतन्त्रमाथिको प्रहार भएको विवेकशीलको भनाइ छ ।

विवेकशील पार्टीका तर्फबाट एक विज्ञप्ति जारी गर्दै आफू असहमत रहेको विचार र अभिव्क्तिलाई निर्वाध रुपमा व्यक्त गर्ने वातावरणको सुनिश्चितता माग गरिएको छ ।

लोकतन्त्रको सुन्दरता नै अभिव्यक्ति स्वतन्त्रता भएको भन्दै विज्ञप्तिमा सरकारले नागरिक स्वतन्त्रता हरण गर्न खोजेको आरोप लगाइएको छ ।

नेपालको संविधानलेसमेत विचार तथा अभिव्यक्ति स्वतन्त्रतालाई अधिकारको मौलिक हकका रुपमा सुनिश्चित गरेको बेलमा पशुपति शर्माको गीत दल निकटका व्यक्तिहरु तथा संगठनहरुको दबाबमा युट्युबाट हटाइएको विवेकशीलको आरोप छ ।

आफ्नो अनुकुलता अनुसार यस्ता घटनामा दिइने दबाबले राष्ट्रको प्रतिभामाथि मनोवैज्ञानिक असर पर्ने भएकाले त्यसतर्फ ध्यान दिन विवेकशीलले सरकारलाई आग्रह गरेको छ ।

‘लुट्न सके लुट कान्छा’ बोलको गीत युट्युबमा सार्वजनिक गरेका गायक पशुपति शर्माले उक्त गीतका केही शव्दमा शुभचिन्तकहरुले आपत्ति जनाएको भन्दै गीतलाई युट्युबाट हटाएका छन् । उनको गीत हटाएसँगै सामाजिक सञ्जालमा यसबारे बहस भइरहेको छ ।

कतिपयले सरकार समर्थितहरुबाट दबाब दिएर गीत हटाउन लगाएको आरोप लगाएका छन् ।

उनले गीत हटाउनुको कारणबारे सामाजिक सञ्जालमा स्टाटस लेख्दै संशोधन गरेर फेरि सार्वजनिक गर्ने जानकारी दिएका छन् ।