दमास्कस– सिरियामा भएको हवाई आक्रमणमा कम्तीमा १२ जनाको ज्यान गएको छ । सिरियाली वायु सेनाले गरेको हवाई आक्रमणमा अरु दर्जनौं घाइते भएका छन् ।

सिरियाको इडलिब प्रान्तको दक्षिणी भेगमा रहेको मार शोरेन गाउँमा सिरियाली वायुसेनाको लडाकु विमानले हवाई कारवाही गरेको सिरियाली युद्धको अनुगमन गरिरहेको संस्थाले जनाएको छ ।

सिरियन अब्जरभेटरी फर ह्युमन राइट्सका अनुसार सिरियाली सेनाले गाउँको बजार क्षेत्रलाई लक्षित गरी हवाई आक्रमण गरेको थियो । मारिने तथा घाइते हुनेमा अधिकांश सर्वसाधारण छन् ।

सिरियाली सेनाले विद्रोहीको नियन्त्रणमा रहेको इडलिब प्रान्तमा सैनिक कारवाहीको तयारी गरिरहेका बेला पछिल्ला केही समययता इडलिब प्रान्तका विभिन्न क्षेत्रमा व्यापक हवाई आक्रमण गर्दै आएको छ ।