काठमाडौं– लगातारको वर्षापछि देशका विभन्न स्थानमा आएको बाढी पहिरोले ठूलो जनधनको क्षति हुन पुग्यो ।

यससँगै सडक र राजमार्ग पनि अवरुद्ध बन्न पुग्यो । अहिले भने वर्षा कम भएसँगै बाढी पहिरोमा कमी आएको छ र अवरुद्ध सडक पनि खुल्दै गएको छ ।

सिन्धुली, रामेछाप, भोजपुर, धनकुटा, ओखलढुंगा, रौतहट, महोत्तरी, मुस्ताङ, मनाङ, पाल्पा, कालीकोटलगायतका जिल्लामा अबरुद्ध भएका अधिकांश सडक सञ्चालनमा आएका हुन् ।

पूर्व–पश्चिम राजमार्गको महोत्तरीमा पर्ने भप्सी खोलाको पुल भत्किएर अवरुद्ध भएको सडक नयाँ डाइभर्सनमार्फत् सञ्चालनमा ल्याइएको सडक विभागले जनाएको छ ।

यस्तै, मुस्ताङको थासाङ घोप्टेभीरमा कालीगण्डकी नदीले सडक बगाउँदा अवरुद्ध बेनी–जोमसोम सडकमा पनि एकतर्फी रुपमा सञ्चालनमा ल्याइएको छ ।

पृथ्वी राजमार्ग र त्रिभुवन राजपथमा पनि कतै अवरोध नभएको ट्राफिक प्रहरीले जनाएको छ । तर, काठमाडौंबाट सिस्नेरी र फाखेल हुँदै हेटौँडा जाने सडक भने अझै सञ्चालनमा आएको छैन ।

अवरुद्ध बीपी राजमार्ग भने सञ्चालनमा आइसकेको प्रहरीले जनाएको छ । बुटवल–पाल्पा जोड्ने सिद्धार्थ राजमार्गको सिद्धबाबा खण्डमा भने अझै गाडी चल्न सकेका छैनन् ।

वर्षा गराउने प्रणाली कमजोर बन्दै गएसँगै अव ठूलो पानी पर्ने सम्भावना नरहेको मौसम विद्हरुले जनाएका छन् ।

मनसुनी न्यूनचापीय रेखा नेपालको दक्षिणतिर सरेकाले देशभर मनसुन कमजोर बन्दै गएको मौसम पूर्वानुमान महाशाखाले जनाएको छ ।