दमास्कस- सिरियाको अलेप्पो प्रान्तमा सिरियाली विद्रोहीले गरेको क्षेप्यास्त्र आक्रमणमा कम्तिमा १२ जनाको ज्यान गएको छ । अलेप्पो प्रान्तको अल–वाहिदी गाउँमा भएको क्षेप्यास्त्र आक्रमणमा अरु १५ जना घाइते भएका छन् । आक्रमणमा मारिनेमा ५ जना बालबालिका रहेको जनाइएको छ ।

सिरियाली सरकारी समाचार संस्था (साना) का अनुसार अल-कायदासम्बद्ध हायात तहरिर अल-शामले उक्त आक्रमण गरेको हो ।

अलेप्पोको ग्रामीण इलाकामा लुकेर बसेका विद्रोहीले आक्रमण गरेको हुनसक्ने सिरियाली गृहयुद्धको अनुगमन गरिरहेको सिरियन अब्जरभेटरी फर ह्युमन राइट्स नामक संस्थाले जनाएको छ ।

पछिल्लो समय सेनाले विद्रोहीविरुद्ध हामा, इडलिब तथा अलेप्पो प्रान्तमा सैनिक कारवाहीलाई तीव्र पारिरहँदा पछिल्लो आक्रमण भएको हो ।