काठमाडौं – अन्ततः अभिनेता राजेश हमालले फिल्म ‘प्रेम गीत ३’ मा अभिनय नगर्ने भएका छन् । केही समयदेखि हमालले ‘प्रेम गीत ३’ मा अभिनय नगर्ने भएका छन् । लामो समयदेखि हमालले यो फिल्ममार्फत नेपाली फिल्म क्षेत्रमा कमब्याक गर्ने बताइएको थियो । तर, अन्तिम समयमा आएर हमालले फिल्ममा काम नगर्ने बताएको निर्माता तथा निर्देशक सन्तोष सेनले जानकारी दिए ।

‘पहिले उहाँले फिल्ममा काम गर्ने इच्छा देखाउनुभएको थियो, पक्का त भएको थिएन, तर आइतवार हामीले अन्तिम छलफल गर्दा समय मिलाउन नसकेको भन्दै फिल्म नखेल्ने बताउनुभयो,’ निर्माता सेनले भने ।

स्रोतका अनुसार यो फिल्ममा हमालले राजाको भूमिका निभाउने भनिएको थियो । निर्माता सन्तोष सेनले हमालले यो फिल्म छोड्नुमा शायद छोटो भूमिका भएको बताए । उनका अनुसार अब उक्त भूमिकाका लागि अब नयाँ कलाकारको खोजी भइरहेको छ ।

फिल्म क्षेत्रमा नदेखिए पनि हमाल पछिल्लो समय व्यस्त नै छन् । हालै ‘को बन्छ करोडपति’ मा देखिएका हमालले फिल्ममा भने अभिनय गरिरहेका छैनन् ।

चलचित्र ‘प्रेम गीत ३’ मा प्रदीप खड्का र मनिष राउतको शीर्ष भूमिका रहनेछ । यस्तै फिल्ममा नयाँ नायिका चयनका लागि अडिसन भइरहेको छ । छायांकनमा जानुपूर्व नै यो फिल्म नयाँ वर्षको अवसर पारेर चैत्र २८ मा रिलिज हुने घोषणा गरिएको छ ।