सोलुखुम्बु– तेञ्जिङहिलारी विमास्थल लुक्लामा भएको विमान दुर्घटनाका विषयमा छानविन गर्न गठित समितिले स्थलगत अध्ययन गरेको छ । टोली बुधबार लुक्ला पुगेर स्थलगत अध्ययन गरेको नागरिक उड्डयन प्राधिकरण लुक्लाका स्टेशन इञ्चार्ज इमनाथ अधिकारीले जानकारी दिए ।

तीन जनाको ज्यान जाने गरी आइतबार समिट एयरको विमान मनाङ एयरको हेलिकप्टरसँग ठोक्किएर दुर्घटना भएको थियो । दुर्घटना भएको भोलिपल्टै संस्कृति, पर्यटन तथा नागरिक उड्डयन प्राधिकरणले छानविन समिति गठन गरेको थियो ।

नेपाल नागरिक उड्डयन प्राधिकरणका पूर्वमहानिर्देशक राजेशराज दली संयोजकत्वको तीन सदस्यीय टोली बुधबार स्थलगत अध्ययनपछि काठमाडौं फर्किएको छ ।

छानविन समितिको सदस्य सचिवमा संस्कृति, पर्यटन तथा नागरिक उड्डयन मन्त्रालयका सहसचिव बुद्धिसागर लामिछाने, तारा एयरका वरिष्ठ क्याप्टेन रवीन्द्र डङ्गोल र नेपाल वायुसेवा निगमका इञ्जिनीयर राजेश श्रेष्ठ रहेका छन् ।

लुक्लाबाट रामेछापको मन्थलीबाट पर्यटक लिन उडेको विमान धावनमार्गमा चिप्लिएर दुर्घटना भएको प्रारम्भिक अनुमान गरिए पनि टोलीले बुझाएको प्रतिवेदनपछि सत्यतथ्य बाहिर आउने अपेक्षा गरिएको छ ।

उक्त दुर्घटनामा परी विमानका सहचालक सुजीत ढुङ्गाना, सुरक्षामा खटिएका प्रहरी सहायक निरीक्षकद्वय रामकुमार खड्का र रुद्रबहादुर श्रेष्ठको मृत्यु भएको थियो । खड्का र ढुङ्गानाको घटनास्थलमै तथा श्रेष्ठको काठमाडौँ उपचारका लागि लैजाने क्रममा मृत्यु भएको थियो ।
दुर्घटनामा परी चार जना घाइते भएका थिए ।