काठमाडौं– आन्तरिक रावश्व अनुसन्धान विभागको टोलीले राजधानीको चक्रपथस्थित एसओएस म्यानपावर कम्पनीमा छापा मारेको छ ।

बुधबार अपराह्न विभागको टोलीले सो म्यानपावरमा छापा मारी केही महत्वपूर्ण कागजातहरु नियन्त्रणमा लिएको विभागका महानिर्देशक दीर्घराज मैनालीले जानकारी दिए ।

विभागले कर छलीको आरोपमा राजधानीका आधा दर्जनभन्दा बढी म्यानपावर कम्पनीमाथि अनुसन्धान जारी राखेकाे महानिर्देशक मैनालीले बताए ।

म्यानपावरले वैदेशिक रोजगारीमा कामदार आपूर्ति गर्दा कर छली गरेको पाइएपछि उनीहरुलाई कारबाहीकाे दायरामा ल्याउन विभागले अनुसन्धान जारी राखेको उनले बताए ।

म्यानपावरले विदेशमा कामदार पठाएको विवरण यथार्थ नबुझाएको तथा ठूलो मात्रामा राजश्व छली गर्ने गरेको विभाग श्रोतको भनाइ छ ।

म्यानपावरहरुले वार्षिक आय र कारोबार वैदेशिक रोजगार विभागमा बुझाउँदा पनि थोरै मात्र देखाएर बुझाउने गरेको बताइन्छ ।