काठमाडौं– आन्तरिक रावश्व अनुसन्धान विभागले आधा दर्जनभन्दा बढी म्यानपावर कम्पनीहरुमाथि कर छली गरेको विषयमा अनुसन्धान गरिरहेको छ ।

विभागले वैदेशिक रोजगारीमा कामदार आपूर्ति गर्दा कर छली गरेको अभियोगमा ती म्यानपावरमाथि अनुसन्धान गरि मुद्दा दर्ता गर्ने तयारी गरिरहेको छ ।

विदेशमा कामदार पठाएको विवरण यथार्थ नबुझाएको भन्दै ती म्यानपावरहरुमाथि अनुसान्धान गरि मुद्दा दर्ता गर्ने लागिएको विभागले जनाएको छ । वैदेशिक रोजगारीको नाममा म्यानपावरले ठूलो मात्रामा राजश्व छली गर्ने गरेको विभाग श्रोतको भनाइ छ ।

म्यानपावरहरुले वार्षिक आय र कारोवार वैदेशिक रोजगार विभागमा बुझाउदा पनि थोरै मात्र देखाएर बुझाउने गरेका छन् । धेरै सख्यामा कामदार रोजगारीमा पठाएपनि कम मात्र आय स्रोत देखाएर कर छली गर्नेगरेको भन्दै राजश्व अनुसन्धान विभागले अनुसन्धान गरिरहेको छ ।

म्यानपावर कम्पनीले राजश्व बुझाएको विषयमा अध्ययन गरिरहेको र कर छली गर्ने म्यानपावरविरुद्ध मुद्दा दर्ता गर्ने तयारी भइरहेको आन्तरिक रावश्व अनुसन्धान विभागका महानिर्देशक दीर्घराज मैनालीले जानकारी दिए । विभागले गत पौष महिनामा स्काई ओभरसिजका मालिक बलबहादुर तामाङलाई करछली गरेको आरोपमा मुद्दा दर्ता गरेको थियो ।

तामाङले १९ करोड ५८ लाख रुपैयाँ करछली गरेको भन्दै विभागले मुद्दा दर्ता गराएको थियो । उनको मुद्दा हाल विचारधीन अवस्था छ ।