वाशिङ्टन– यमनमा जारी युद्धका लागि अमेरिकाले साउदी अरबलाई गर्दै आएको सहयोग रोक्का गर्ने विषयमा अमेरिकी कङ्ग्रेसले पारित गरेको प्रस्तावलाई राष्ट्रपति डोनाल्ड ट्रम्पले भिटो प्रयोग गरेर उल्ट्याइदिएका छन् ।

अमेरिकी राष्ट्रपति डोनाल्ड ट्रम्पले कङ्ग्रेसको प्रस्ताव अनावश्यक र खतरनाक भएको भन्दै त्यसविरुद्ध भिटो प्रयोग गरेका हुन् ।

‘यो प्रस्ताव खतरनाक र अनावश्यक छ र यसले आफूलाई प्रदान गरिएको संवैधानिक अधिकारलाई पनि कमजोर आँकेको छ । यसले हाल र भविष्यमा अमेरिकी नागरिक र बहादुर सैनिकको जीवन पनि खतरामा पार्नेछ,’ यमनमा जारी युद्धमा साउदी अरबलाई गर्दै आएको अमेरिकी सहयोग रोक्का गर्ने विषयमा पारित प्रस्तावमा भिटो प्रयोग गर्ने बेला ट्रम्पले जारी गरेको सन्देशमा उल्लेख छ ।

टर्कीको सबैभन्दा ठूलो शहर इस्तानबुलमा साउदी एजेण्टहरुले पत्रकार जमाल खशोग्जीको हत्या गरेपछि यमनमा जारी युद्धमा साउदी अरबलाई गर्दै आएको सहयोग रोक्का गर्ने विषयमा अमेरिकी कङ्ग्रेसले कदम चालेको थियो ।

यसक्रममा साउदी अरबलाई गर्दै आएको सहयोग रोक्का गर्ने विषयमा कङ्ग्रेसको तल्लो सदन हाउस अफ रिप्रेजेन्टेटिभले गत अप्रिल र माथिल्लो सदन सिनेटले गत मार्च महिनामा प्रस्ताव पारित गरेका थिए ।

अमेरिकी कङ्ग्रेसको दुबै सदनले राष्ट्रपतिलाई कुनै पनि मुलुकमा सेना पठाउन बन्देज गर्नेगरी प्रस्ताव पारित गरेको यो पहिलो पटक रहेको अन्तर्राष्ट्रिय सञ्चारमाध्यमले जनाएका छन् ।

सन् २०१५ यता यमनमा चर्किएको हिंसामा साउदी अरब नेतृत्वको गठबन्धनको हवाई आक्रमण र अन्य किसिमका हिंसाबाट ७ हजार जनाभन्दा धेरैको ज्यान गएको संयुक्त राष्ट्र संघले जनाएको छ ।

मारिनेमा ६५ प्रतिशत भन्दा धेरै साउदी अरब नेतृत्वको गठबन्धनको हवाई आक्रमणबाट मारिएको बताइन्छ ।

यमनमा युद्धरत हुथी विद्रोहीलाई आफ्नो क्षेत्रीय प्रतिद्वन्द्वी इरानको सहयोग रहँदै आएको भन्दै साउदी अरबले त्यहाँ भारी मात्रामा सैनिक तथा हवाई आक्रमण गर्दै आएको छ ।

यमनमा साउदी सैनिक अभियानका लागि अमेरिकाले अर्बौं डलर बराबरको हतियार तथा गोप्य जानकारी दिने गरेको छ ।