अफगानिस्तान– पश्चिमी अफगानिस्तानको बदगिश प्रान्तमा इस्लामिक लडाकु समूह तालिबानका लडाकुहरु तथा सरकारी सेनाबीच भीडन्त बढ्दै जाँदा तालिबान लडाकुले ५० जनाभन्दा धेरै सीमा सुरक्षा प्रहरीलाई पक्राउ गरेका छन् ।

तुर्कमेनिस्तानसँग सीमा जोडिएको क्षेत्रमा तालिबानले आक्रमण गरेपछि त्यहाँ रहेका १ सय भन्दा धेरै सीमा सुरक्षा प्रहरी त्यहाँबाट तुर्कमेनिस्तानतर्फ भाग्न खोजेका थिए । तर, तुर्कमेनिस्तानतर्फ उनीहरुलाई प्रवेश नदिइएपछि उनीहरुमध्ये ५० जनाभन्दा धेरैले तालिबानसमक्ष आत्मसमर्पण गरेको स्थानीय अधिकारीले जनाएका छन् ।

तालिबानसँग वषैँदेखि लडिरहेका सुरक्षाकर्मीले आत्मसमर्पण गरेपछि तालिबान लडाकुले उनीहरुको हत्या गर्नसक्ने चिन्ता रहेको बताइएको छ । यता तालिबानले भने उक्त भीडन्तमा ९० जना अफगान सुरक्षाकर्मी आत्मसमर्पण गरेको जनाएको छ ।

सामाजिक सञ्जाल ट्विटरमा सन्देश जारी गर्दै आत्मसमर्पण गरेका ९० बाहेक अरु धेरै अफगान प्रहरी आफ्नो कारवाहीमा मारिएको तालिबानले जनाएको छ । भीडन्तमा तालिबान तर्फ कति हताहति भयो भन्ने बारे स्पष्ट भइसकेको छैन ।