काठमाडौं– गुठी संस्थानका प्रमुख नारायण चौधरी र जयप्रसाद रेग्मी पक्राउ

काठमाडौंको त्रिपुरेश्वरस्थित गुठी संस्थानका प्रमुख (प्रशासक) नारायणप्रसाद चौधरी र उपप्रशासक जयप्रसाद रेग्मी पक्राउ परेका छन् ।

अख्तियार दुरुपयोग अनुसन्धान आयोगको टंगालस्थित कार्यालयबाट खटिएको टोलीले चौधरी र रेग्मीलाई त्रिपुरेश्वरस्थित गुठी संस्थाको कार्यालयबाटै पक्राउ गरेको हो ।

अख्तियार दुरुपयोग अनुसन्धान आयोगका केन्द्रीय प्रवक्ता प्रदीपकुमार कोइरालाले चौधरी र रेग्मी पक्राउ परेको पुष्टि गरे ।

अख्तियार स्रोतका अनुसार जग्गासम्बन्धी विवादमा घुस रकम लिएको अभियोगमा चौधरी र रग्मीलाई पक्राउ गरिएको हो ।

उनीहरुले जग्गासम्बन्धी विवाद मिलाइदिने भन्दै सेवाग्राहीसँग घुस लिएका थिए । तर, अख्तियारको टोलीले निगरानी गरिरहेको जानकारी पाएपछि घुस लिनेवित्तिकै फिर्ता गरेका थिए ।

अख्तियारका प्रवक्ता कोइरालाले चौधरी र रेग्मीले घुस माग गरेको तथा घुस रकम लिएको अन्य प्रमाणा प्राप्त भएकाले मंगलबार दिउँसो दुवैजनालाई पक्राउ गरिएको जानकारी दिए ।