काठमाडौं- अमेरिकी विमान निर्माता कम्पनी बोइङ्गले समस्याग्रस्त ७३७ म्याक्स संस्करणको विमान निर्माण अस्थायी रुपमा बन्द गर्ने भएको छ ।

बोइङ्गले आउँदो जनवरीदेखि अस्थायी रुपमा ७३७ म्याक्स सिरिजका जहाजको निर्माण बन्द गर्ने जनाएको बीबीसीले उल्लेख गरेको छ ।

दुई ठूला दुर्घटनामा ३०० जना भन्दा बढीको मृत्यु भएपछि पछिल्लो ९ महिनादेखि विश्वभर बोइङ्ग ७३७ म्याक्स संस्करणका विमान ग्राउण्डेड भएका छन् ।

बोइङ्गले यो संस्करणका विमानको उत्पादन भने रोकेको थिएन । इन्डोनेसिया र इथियोपियामा ७३७ म्याक्स विमान दुर्घटना हुँदा ३०० जना भन्दा बढीको मृत्यु भएको हो ।

अमेरिकी नियामक निकायले भने सो संस्करणको विमानलाई चाँडै नै उडानका लागि स्वीकृति प्रदान नगरिने स्पष्ट पारेको छ ।

अमेरिकाको वासिङ्गटन, सियाटलमा रहेको बोइङ्ग अमेरिकाको ठूलो विमान निर्माता कम्पनी मध्ये एक हो । यसले उत्पादन गरेका विमान विश्वका विभिन्न देशले किन्ने गरेका छन् ।