काठमाडौं– १३ औं दक्षिण एसियाली खेलकुद (साग) को काउन्ट डाउन सुरु भएको छ ।

नेपालमा आयोजना हुने १३ औं साग आयोजक मूल समितिले शनिबार राजधानीमा पत्रकार सम्मेलन गर्दै सागको काउन्ट डाउन शुरु भएको घोषणा गरेको हो ।

साग सुरु हुन १५ दिन बाँकी रहदा काउन्ट डाउन सुरू गरिएको हो ।

कार्यकममा राष्ट्रिय खेलकुद परिषद (राखेप) का सदस्य सचिव रमेश सिलवालले सागको वेभ साईटको उद्घाटन गरे । सागका सहभागी देशको पहिचान झल्काउने शहरहरुको भिडियो सहित सागको प्रोमो पनि सार्वजनिक गरिएको छ ।

सागमा ३२५२ खेलाडीले ३२४ स्वर्ण, ३२४ रजत तथा ४८७ कास्यका लागि प्रतिस्पर्धा गर्नेछन् ।

स्वर्ण, रजत र कास्यगरि जम्मा ११३२ पदक सागमा रहेका छन् । सहभागी देशमध्य नेपालले सबैभ्दा धेरै ६४८ खेलाडी रहेका छन् भने श्रीलंकाले ६१२ खेलाडीलाई सागमा सहभागी गराउने छ भने बंगलादेशले ५९१ खेलाडी मैदान उतार्नेछ ।

यस्तै भारतले ५२१ खेलाडी, पाकिस्तानले ४१३, माल्दिभ्स ३३२ र भुटाने १३२ खेलाडीलाई मैदान उतार्नेछ ।

नेपाल २७ खेल, श्रीलंका र बंगलादेशले समान २५-२५ खेल, भारतले २०, पाकिस्तानले १८, भुटानले १४ र माल्दिभ्स सबैभन्दा कम १० खेलमा सहभागी हुनेछ । नेपालले ५० स्वर्ण जित्ने राखेको राखेपले जनाएको छ । यसअघि ८ औ सागमा नेपालले ३१ स्वर्ण जितेको थियो ।

१३ औं साग मंसिर १५ देखि २४ गतेसम्म काठमाडौं,पोखरा र जनकपुरमा हुनेछ ।