काठमाडौं– नेपालमा पहिलो पटक हुन लागेको महिला टि–२० च्याम्पियन्स लिग (डब्लुसीएल) क्रिकेट आजबाट शुरु हुँदैछ ।

प्रतियोगिता अन्तर्गत उद्घाटन खेलमा काठमाडौं क्विन्स र चितवन राइनोजबीच प्रतिस्पर्धा हुनेछ । क्विन्स इभेन्ट्स म्यानेजमेन्टले आयोजना गरेको महिला क्रिकेटका खेल कीर्तिपुर क्रिकेट मैदानमा हुनेछन् ।

बिहान साढे ११ बजेबाट शुरु हुने खेलको उद्घाटन राष्ट्रिय खेलकुद परिषद्का सदस्यसचिव रमेश सिलवालले गर्नेछन् । प्रतियोगिताको विजेताले सात लाख र उपविजेताले तीन लाख रुपैयाँ पाउने सार्वजनिक भइसकेको छ । यस्तै ब्यक्तिगत विधातर्फ प्रतियोगिताको उत्कृष्ट महिला खेलाडीले ५० हजार र एक थान टिभिएस स्कुटर पाउनेछन ।

यस्तै बेष्ट बलर र बेष्ट ब्याटरले २५–२५ हजार रुपैयाँ तथा ओमन अफ दि म्याचले पाँच हजार रुपैयाँ हात पार्ने छन् ।

कार्तिक सात गतेसम्म चल्ने प्रतियोगिताको दोस्रो खेलमा क्याट क्विन्स र पोखरा पल्टन भिड्नेछन् ।

प्रतियोगितामा सहभागिता जनाउने टिममा ललितपुर फाल्कोन्स, पोखरा पल्टन, क्यापिटल्स रोयल्स काठमाडौं, चितवन राइनोज र विराटनगर टाइटन्स रहेका छन् ।

लिग चरणको उद्घाटन हुने दिन बाहेक अन्य दिन २–२ वटा खेल हुनेछन् । (डब्लुसीएल) टी–ट्वेन्टी क्रिकेट प्रतियोगिताको ट्रफी मंगलबार सार्वजनिक गरिएको थियो ।