एजेन्सी- स्वीडेनसँग बराबरी खेल्दै स्पेन अर्को वर्ष हुने युरोकप फुटबलका लागि छनोट भएको छ ।
मंगलबार राति समुह एफको खेलमा स्वीडेनसंग १–१ गोलको बराबरी खेल्दै स्पेन युरोकपका लागि छानिएको हो ।

स्पेनलाई छनोट हुन मात्र १ अंकको आवश्यकता थियो । गएराति भएको खेलमा उसले स्वीडनसँग बराबरी खेल्दै १ अंक जोडेको हो ।

खेलमा अग्रता स्वीडेनले लिएको थियो । खेलको ५० औ मिनेटमा मार्कस बर्गले गोल गर्दै स्वीडेनलाई अग्रता दिलाए पनि अग्रता जोगाउन सकेनन् । दोस्रो हाफको ईन्जुरी समयमा रोड्रिगोले गोल गर्दै स्पेनको अंक जोडेका थिए ।

दोस्रो हाफमा घाइते भएपनि मैदान छाड्नु अघि स्पेनका गोलकिपर डेभिड डी जियाले रोबिन क्वेसनको उत्कृष्ट हेडको बचाउ गरेका थिए ।
समुह एफबाट स्पेनले ८ खेलबाट २० अंक जोड्यो । स्पेनले दुई खेल बाँकी छदाँ तेस्रो स्थानको रोमानियासंग ६ अंकको अग्रता लिएको हो । स्पेन युरोकपमा छनोट हुने छैटौ टिम बनेको छ । यसअघि बेल्जियम, ईटाली, रुस, पोल्याण्ड र युक्रेन प्रतियोगितामा छनोट भइसकेका छन् । युरोकपमा स्पेन तीन पटकको विजेता टोली हो ।