काठमाडौं– नेपाल स्वास्थ्य अनुसन्धान परिषदले डेंगु रोगबारे पर्याप्त अनुसन्धान गरिएको स्पष्ट पारेको छ ।

डेंगु रोगबारे आवश्यक अनुसन्धानसमेत नगरिएको भन्दै सरकारको आलोचना भईरहेका बेला नेपाल स्वास्थ्य अनुसन्धान परिषदले सोमबार पत्रकार सम्मेलन गरी डेंगुबारे सुक्ष्म रुपले अनुसन्धानको काम गरिएको प्रष्टयाएको हो ।

डेंगु लाग्नुको कारणबारे मिहिन ढंगले अनुसन्धान भईसकेको परिषदका अध्यक्ष डा. अञ्जनीकुमार झाले जानकारी दिए । उनले डेंगुबारे अनुसन्धान नै नभएको भन्ने भनाईमा कुनै सत्यता नरहेको पनि स्पष्ट पारे ।

परिषदले डेंगु लाग्न नदिन जनचेतनामूलक कार्यक्रम सञ्चालनको काम पनि सुरु गर्ने घोषणा गरेको छ । परिषदका अध्यक्ष झाले डेंगु लाग्न नदिने गरी जनचेतनामूलक कार्यक्रम सञ्चालन गर्ने बताए ।

घरभित्र र घर वरपर विशेष ढंगले सफाइ गरे डेंगुको संक्रमण नहुने परिषदले जनाएको छ । परिषदले लामखुट्टेको नियन्त्रणका लागि घरभित्र र बाहिर कुनै पनि ठाउँमा पानी जम्न दिन नहुनेतर्फ पनि सचेत गराएको छ ।