चितवन- नारायणगढ-मुग्लिन सडकखण्ड अन्तर्गत विभिन्न क्षेत्रमा भासिएको सडकको अवस्था बुझ्न भौगर्भिक अध्ययन सुरु गरिएको छ ।

भासिएको र जोखिमपूर्ण गरी सात ठाउँमा भौगर्भिक अध्ययन गरिरहेको नारायणगढ–मुग्लिन सडक आयोजना कार्यालयका इञ्जिनीयर शिव खनालले जानकारी दिए । सडक भासिएको खण्ड २६ किलोमिटरमा र १७ किलोमिटर क्षेत्रमा सर्वे भइरहेको छ ।

भासिएको सडकखण्डमा अहिले एकतर्फी रूपमा सवारी आवागमन भइरहेको छ । टोलीले एक महिनाभित्र अध्ययनसहित डिजाइनको प्रतिवेदन दिनेछ ।

धमाधम पुल बन्दै

नारायणगढ–मुग्लिन सडकखण्डमा निर्माणाधीन ४ पुलको ५० प्रतिशत काम सकिएको छ । सडक आयोजनाका इञ्जिनीयर खनालका अनुसार जलवीरे, मौरी, खानीखोला र दासढुङ्गा पुलको निर्माण दू्रतगतिमा अघि बढेको छ ।

सडकखण्डमा अझै १४ पुल निर्माणको काम भने अघि बढ्न सकेको छैन। १८ पुलमध्ये चार वटाको मात्र निर्माण जारी रहेको र बाँकी १४ पुल निर्माणको काम छिट्टै सुरु हुने आयोजना प्रमुख रोहित विसुरालले जानकारी दिए।