काठमाडौं– ललितपुर महानगरपालिका चौथो नगरसभाले आगामी आर्थिक वर्ष २०७६∕२०७७ को लागि ५ अर्ब ३१ करोड ४३ लाख ५७ हजारको बजेट पारित गरेको छ ।

नगरपालिकाको मंगलबार सम्पन्न नगरसभाले आर्थिक वर्ष २०७६∕२०७७ को बजेटमा पूर्वाधार, मूर्त तथा अमूर्त सम्पदा संरक्षण, हरियाली संरक्षणलाई प्राथमिकतामा राखेको छ । महानगरपालिका प्रमुख चिरीबाबु महर्जनले भने, ‘पूर्वाधार निर्माणसँगै, हरियाली प्रव नलाई प्राथमिकतामा राखेका छौं । ’

विकास सूचकांकको आधारमा महानगरपालिकाले वडाहरुलाई तीन किसिममा वर्गिकरण गरि बजेट छुट्याएको छ । पहिलो किसिममा परेका वडालाई एक करोड ६५ लाख बजेट विनियोजन गरिएको छ ।

यस अन्तर्गत महानगरका वडा नं १,६ ७, ८,१०, ११, १९ रहेका छन् । दोस्रोमा परेका वडालाई दुई करोड छुट्याइएको छ । यस अन्तर्गत २,३,४,५,९,१३,१४, १५, १७ छन् ।

तेस्रो किसिममा परेका वडाहरुलाई दुई करोड ७५ लाख छुट्याइएको छ । जसमा वडा नं १२, १६, १८ , २० २१ , २२, २३,२४, २५, २६, २७, २८, २९ पर्छन् ।

मेयर महर्जनले महानगरका सबै वडामा विकास समान गतिमा नभएकाले वर्गिकरण गरी विकास खर्चको आवश्यकता अनुसार बजेट छुट्याएको बताए । ललितपुर महानगरपालिकामा २९ वडा रहेका छन् ।