हङ्कङ– हङ्कङ सरकारले विवादास्पद सुपुर्दगी विधेयकको प्रक्रिया स्थगित गरेपनि विपक्षीले सरकार विरोधी विशाल प्रदर्शनलाई निरन्तरता दिएका छन् ।

हङ्कङको सडकमा दशौं हजार मानिसहरुले शहरकी प्रमुख कार्यकारी क्यारी लामको राजीनामा माग्दै प्रदर्शन गरेका हुन् ।

प्रदर्शनकारी सेतो फूल बोकेर सडकमा ओर्लिएका छन् । शनिबार एक भवनबाट खसेर ज्यान गुमाएका प्रदर्शनकारीको शोकमा सेतो फूल लिएर प्रदर्शनकारी सडकमा ओर्लेको अन्तर्राष्ट्रिय सञ्चारमाध्यमले जनाएका छन् ।

अघिल्लो साता त्यहाँ भएको व्यापक प्रदर्शनपछि प्रमुख कार्यकारी क्यारी लामले विवादास्पद सुपुर्दगी विधेयकको संसदीय प्रक्रिया अनिश्चितकालसम्मका लागि स्थगित गरिएको घोषणा गरेकी थिइन् ।

अघिल्लो साता भएका प्रदर्शनमा दश लाख प्रदर्शनकारीको सहभागिता थियो ।

बुधबार प्रदर्शनकारी र सुरक्षाकर्मीबीच भएको झडपमा ७० जनाभन्दा धेरै घाइते भएका थिए । प्रमुख कार्यकारी लामले प्रदर्शनप्रति दुःख र पश्चाताप महशुस गरेको जनाएपनि उनले पदबाट राजीनामा दिन भने अस्वीकार गरेकी थिइन् ।

प्रदर्शनकारीले भने प्रमुख कार्यकारीका रुपमा उनी असफल सिद्ध भइसकेकाले उनले पदबाट राजीनामा दिनुपर्ने माग गरेका छन् ।