काठमाडौं – प्रधानमन्त्री केपी शर्मा ओलीले सरकारले ल्याएको गुठी विधेयकमा केहि कमिकमजोरी भए सच्याइने बताएका छन् । एक साता लामो युरोप भ्रमण सकेर स्वदेश फर्केका प्रधानमन्त्री ओलीले सांस्कृतिक, ऐतिहासिक धरोहर तथा परम्परा र रितिस्थितिका क्षेत्रमा सरकारले गर्नुपर्ने काममा केहि तलमाथि भए त्यसलाई सच्याइने बताए ।

उनले जनताको मन दुखाउने गरी सरकारले कुनै काम नगर्ने पनि स्पष्ट पारे । त्रिभुवन अन्तर्राष्ट्रिय विमानस्थलमा पत्रकारहरुसँग कुराकानी गर्दै ओलीले गुठीलाई नियमन गर्न विधेयक ल्याएको भन्दै गुठीले गरीबमाथि शोषण गरेको बताए ।

जनताप्रति सरकार उत्तरदायी रहेको भन्दै उनले सरकारले सँधै जनताको हीतमा काम गर्ने भएकाले अब जनताले आन्दोलन गर्ने दिन नआउने पनि बताए ।

गुठी विधेयकका विषयमा प्रतिपक्षी दल तर्फ लक्षित गर्दै प्रधानमन्त्री ओलीले अब विधेयकका विषयमा भएको विरोधको मौका छोपेर फाइदा नउठाउन आग्ह गरे ।