काठमाडौँ- विवेकशील साझा पार्टीले आउँदो वर्षको फागुनमा पहिलो महाधिवेशन गर्ने भएको छ। पार्टी विभाजनपछि पहिलोपटक बसेको केन्द्रीय समिति बैठकले २०७६ फागुन १५ देखि १९ गतेसम्म काठमाडौंमा महाधिवेशन गर्ने निर्णय गरेको हो।

प्रवक्ता सूर्यराज आचार्यका अनुसार पुस ३० र माघ १ गते चलेको बैठकले प्रदेश संयोजक चयन, केन्द्रीय सदस्य थप, पार्टी भ्रातृ संगठन निर्माण, पार्टी केन्द्रीय विभागको पुनर्गठन, जिम्मेवारी बाँटफाँट लगायतका निर्णय गरेको छ।

संयोजक उज्ज्वल थापाले नयाँ पार्टी दर्ताका लागि निर्वाचन आयोगमा निवेदन दिएपछि विवेकशील साझाको केन्द्रीय समिति बैठक बसेको हो। बैठकबाट प्रदेश नंं. १ को संयोजकमा अनिल भेटवाल चयन भएका छन्।

प्रदेशको सिफारिसमा महिला केन्द्रीय सदस्य मनोनीत गर्ने निर्णयअनुसार सुदूरपश्चिम प्रदेशबाट शैलु श्रेष्ठ, प्रदेश ५ बाट सरस्वती पन्थी भुसाल र गण्डकी प्रदेशबाट सुशीला केसी अधिकारी चयन भएका प्रवक्ता आचार्यले जनाए।

त्यस्तै अब्दुस मियाँको संयोजकत्वमा विवेकशील साझा युवा संगठन र सोभिता परियारको नेतृत्वमा विवेकशील साझा महिला संगठन गठन गरिएको छ।