सुनसरी– जिल्ला अदालत सुनसरीले जवरजस्ती करणी (बलात्कार)को आरोप लागेका सिद्धबाबा भनिने कृष्णदास गिरीलाई थप ७ दिन हिरासतमा राखेर अनुसन्धान गर्न अनुमति दिएको छ ।

यसअघि थपिएको ३ दिनको म्याद सकिएपछि प्रहरीले सोमबार सिद्धबाबालाई जिल्ला अदालत सुनसरीमा उपस्थित गराएको थियो ।

अदालतले गिरीमाथि अनुसन्धानका लागि ७ दिनको म्याद थप गरेको हो ।

सुनसरीको चतरास्थित उनकै आश्रममा रहेकी एक महिला (अनुयायी)ले सिद्धबाबा भनिने गिरीमाथि बलात्कारको आरोप लगाएकी थिइन् ।

जिल्ला अदालत सुनसरीले गिरीलाई पक्राउ गर्न अनुमति दिएपछि उनी गत मंसिर १३ गते नै अस्पताल भर्ना भएका थिए ।

प्रहरीले गत सोमबार (मंसिर १६ गते) गिरीलाई अस्पतालबाट ‘पक्राउ’ गरी अदालतमा उपस्थित गराएको थियो ।

तर, गिरी भने आफूलाई मुटुको समस्या रहेको भन्दै विराटनगरस्थित विराट नर्सिङ होमको आईसीयूमै छन् ।

सोमबार पनि अदालतले अनुसन्धानका लागि म्याद थप गरेपछि गिरी प्रहरी हिरासतमा नगई अस्पताल नै गएका हुन् ।