एजेन्सी– क्रिस्टियानो रोनाल्डोले दुई गोल गर्दा साविक विजेता युभेन्ट्सले इटालियन सिरी ए फुटबलमा जित निकालेको छ ।

आइतबार भएको खेलमा युभेन्ट्सले उडिनेसेलाई ३-१ गोल अन्तरले पराजित गरेको हो ।

घरेलु मैदानमा युभेन्ट्सलाई जित दिलाउन क्रिस्टियानो रोनाल्डोले दुई गोल गर्दा लियोनार्दो बुनिचीले एक गोल गरे ।

उडिनेसेका इग्नासिया पुसेतो एक गोल फर्काए । पुसेतोको गोल अघि रोनाल्डोले ह्याट्रिक गर्ने अवसर सिर्जना गरेका थिए । तर उनले गरेको प्रहार गोलमा परिणत हुन सकेन ।

खेलको इन्जुरी समयमा पुसेतोले एक गोल फर्काएपनि युभेन्ट्स ३-१ ले विजयी भयो ।

जितसँगै युभेन्ट्स लिगको शीर्ष स्थानमा उक्लिएको छ । युभेन्ट्सले १६ खेलमा ३९ अंक जोडेको छ । १५ अंक जोडेको उडिनेसे लिगको १७ औं स्थानमा रहेको छ ।