एजेन्सी– स्पेनिस लिग फुटबलमा रियल मड्रिड हारबाट जोगिएको छ ।

करिम बेन्जिमाको गोलमा रियल मड्रिड हारबाट जोगिएको हो । आइतवार राति भएको खेलमा रियल मड्रिडले भ्यालेन्सियासंग १–१ गोलको बराबरी खेल्दै अंक बाँडेको हो ।

हारको नजिक पुगेको रियलका लागि बेन्जिमाले अन्तिम समयमा गोल गर्दै रियलका लागि अंक खोसेका थिए ।

उनले दोस्रो हाफको ईन्जुरी समयमा गोल गर्दै खेल बराबरीमा ल्याउन सफल रहे ।

खेलमा अग्रता घरेलु टोली भ्यालेन्सियाले ७८ औ मिनेटमा कार्लोस सोलेरको गोलबाट लिएको थियो ।

बराबरीको नतिजासंगै रियल तालिकाको शीर्ष स्थानमा उक्लिने मौका गुमायो ।

समान अंक भएपनि रियल मड्रिड बार्सिलोनासंग गोल अन्तरका आधारमा पछाडि परेको छ । बार्सिलोना ३५ अंक सहित शीर्ष स्थानमा छ । रियल बराबर अंक जोड्दै तालिकाको दोस्रो स्थानमा छ ।

भ्यालेन्सिया २७ अंक सहित तालिकाको आठौं स्थानमा छ ।