एजेन्सी– चीनले हङकङमा आफ्नो जनमुक्ति सेनालाई तैनाथ गरेको छ ।

समाचार संस्था रोयटर्सका अनुसार चीनको पिपुल्स लिबरेशन आर्मी पीएलएका सैनिकले शनिवार हङकङको सडकमा आश्चर्यजनक रुपमा प्रदर्शन गरेका छन् ।

सरकार विरोधी प्रदर्शनपछि अवरुद्ध भएको सडक र भवनहरुलाई सफाइ गर्दै उनीहरु अघि बढेको देखिएको समाचारमा उल्लेख गरिएको छ ।

सडकमा पीएलए सैनीकको उपस्थितिले चिनियाँ शासित क्षेत्रको स्वायत्तता माथि थप विवाद उत्पन्न हुने सम्भावना रहेको समाचारमा जनाइएको छ ।

६ महिनादेखि जारी प्रदर्शनलाई नियन्त्रणमा लिन चिनियाँ जनमुक्ति सेना खटाइएको बताइन्छ । जनमुक्ति सेनाले भने आफू शान्ति कायम गराउन यहाँ आएको प्रतिक्रिया दिएको छ ।

हङकङको प्रदर्शनबारे चिनियाँ सेनाले पटक पटक टिप्पणी गर्दैआएको थियो । हङकङ प्रदर्शनलाई चीनले ‘हिंसात्मक घटना’, ‘अराजक भीड’ तथा ‘प्रायोजित भीड’ जस्ता टिप्पणी गरेको थियो ।