काठमाडौं– काठमाडौंको खुल्लामञ्चस्थित दुईमाजु गुठीमा पसल राख्न बनाइएका अस्थायी टहरामा काठमाडौं महानगरपालिकाले ताला लगाएको छ ।

पटकपटक अतिक्रमणको चपेटामा पर्दै आइरहेको खुल्लामञ्चभित्रको दुईमाजु गुठीको जग्गा गुठी संस्थानले अमृता भट्टराईलाई संरक्षण तथा रेखदेखका लागि दिएको थियो । तर भट्टराईले रेखदेख गर्ने बहानामा १७ वटा अस्थायी टहरा बनाइ गुठी परिसरलाई व्यापारिक केन्द्र बनाएसँगै स्थानीय तथा सम्पदा अभियान्ताले विरोध गरेका थिए । त्यससँगै गुठी संस्थानले उक्त सम्झौता भंग गरिसकेको छ ।

यसअघि गत कार्तिक ६ गते काठमाडौं महानगरले दईमाजु गुठीका जग्गा खाली गर्नका लागि अनुरोध समेत गरेको थियो ।

‘महानगरले दुईमाजु परिसरलाई व्यापारीक केन्द्र नबनाउन यसअघि पनि सुझाव दिइसकेको थियो,’ काठमाडौं महानगरपालिकाकी उपप्रमुख हरिप्रभा खड्गीले भनिन्, ‘व्यापारीहरु हट्न नमानेपछि आज जबरजस्त ताला लगाएको हो’ ।

खड्गीले विभिन्न बहानामा टुँडिखेलका जग्गाहरु अतिक्रमणको चपेटामा परिरहेको बताइन् । ‘हामीले खुल्ला स्थानको संरक्षण गर्नुपर्छ, यो हाम्रो दायित्व पनि हो,’ उनले भनिन्, ‘आज दुईमाजु खाली गर्‍यौं । आगामी दिनमा टुँडिखेल पुरै खाली गरिनेछ ।’