काठमाडौं– भारतको स्वतन्त्रता दिवसका अवसरमा नेपाल स्थित भारतीय दूतावासले विविध कार्यक्रमको आयोजना गरी विभिन्न संघ संस्थालाई एम्बुलेन्स र बस हस्तान्तरण गरेको छ ।

बिहिबार काठमाडौँमा रहेको भारतीय दुतावासले ७३ औं स्वतन्त्रता दिवसका अवसरमा नेपालका विभिन्न अस्पताल, गैरनाफामूलक परोपकार संस्था तथा शैक्षिक संस्थाहरुलाई ३० वटा एम्बुलेन्स र ६ वटा बस हस्तान्तरण गरेको हो । नेपालका लागि भारतीय राजदूत मन्जिव सिंह पुरीले भारतीय सेनामा कार्यरत रहँदा बीरगति प्राप्त गरेका सैनिकका परिवारलाई आर्थिक सहायता रकम हस्तान्तरण गरे ।

भारत सरकारले ३ परिवार लाई वीर नारी, ५ जना एकल महिला र ६ जना दिवंगत सैनिकका परिवारलाई ५ करोड ३१ लाख नेपाली रुपैयाँ बराबरको नगद तथा जिन्सी सहयोग गरेको छ । यस्तै दूतावासले ४० वटा पुस्तकालय तथा नेपालका सबै प्रदेशमा फैलिएका शैक्षिक संस्थाहरुलाई पुस्तक सहयोग पनि उपलब्ध गराएको छ ।