काठमाडौं –युइएफ सुपर कपको उपाधि लिभरपुलले उचालेको छ । बुधबार राति भएको सुपर कपको खेलमा चेल्सीलाई पेनाल्टी सुटआउटमा पराजित गर्दै लिभरपुलले उपाधि हात पारेको हो ।

निर्धारित समयको खेल २–२ गोलको बराबरीमा सकिएपछि निणर्य टाईब्रेकरमा गरिएको थियो । जसमा लिभरपुल ५–४ ले विजयी बन्यो । लिभरपुलको जितमा साडियो माने नायक रहे । उनैले लिभरपुलका लागि दुई गोल गरे ।

चेल्सी र लिभरपुलबीचको खेल निकै प्रतिस्पर्धात्मक बनेको थियो । खेलमा शुरुवाती अग्रता भने चेल्सीले बनाएको थियो । ३६ औ मिनेटमा ओलिभर गिराउडले गोल गर्दै चेल्सीलाई अग्रता दिलाएका थिए । ४८ औ मिनेटमा लिभरपुलका लागि साडियो मानेले गोल गर्दै खेल बराबरीमा गरेका थिए ।

९५ औ मिनेटमा मानेले व्यक्तिगत दोस्रो गोल गर्दै लिभरपुललाई २– को १अग्रता दिलाए । तर चेल्सीका मिडफिल्डर जोर्गिन्होले पेनाल्टीमार्फत गोल गर्दै खेल बराबरीमा फर्काए ।

टाईब्रेकरमा लिभरपुलका गोलकिपर एड्रियनले टमी अब्राहमको पेनाल्टी रोकेपछि च्याम्पियन्स लिग विजेता लिभरपुलले सिजनको पहिलो उपाधि उचालेको हो ।