काठमाडौं – आज शुक्रवारदेखि नेपालका सिंगल तथा मल्टिप्लेक्स हलमा नेपाली फिल्म ‘बुलबुल’ रिलिज हुँदैछ ।

विनोद पौडेलले निर्देशन गरेको यो फिल्ममा स्वस्तिमा खड्का र मुकुन भुसालको मुख्य भूमिका छ । फिल्ममा स्वस्तिमाले पत्नी, आमा तथा एक टेम्पो चालिकाको भूमिका निभाएकी छिन् । यो फिल्म निर्माणको औपचारिक घोषणापछि नै दर्शकमाझ प्रतीक्षित बनेको थियो ।

ट्रेलर तथा गीतका कारण फिल्मले रिलिजअघि नै बाक्लो चर्चा कमाएको छ । यद्यपि विदेशी फिल्मसमेत हलमा रिलिज भइरहेकाले फिल्मले मल्टिप्लेक्स हलमा धेरै स्किृन पाउन सकेको छैन ।

काठमाडौंका केही हलमा गत शुक्रवार रिलिज भएको फिल्म ‘समर लभ’ पनि चलिरहेको छ ।

अविरल थापा, भीम थापा, राजु पौडेल र पुरुषोत्तम पाण्डेले निर्माण गरेको यो फिल्ममा कथा तथा स्किृप्ट निर्देशक पौडेलकै रहेको छ ।

फिल्ममा स्वस्तिमा र मुकुनसँगै जोयश पाण्डे, लक्ष्मी बर्देवा, दीपक क्षेत्री, उज्ज्वल अधिकारी, एलिना कार्की लगायतले अभिनय गरेका छन् ।