काठमाडौं–दुई तिहाइको एक वर्षलाई समेटेर अन्नपूर्ण पोस्ट दैनिकले ‘खाली भाँडो आधा भरियो’ शीर्षकमा मुख्य समाचार छापेको छ । सरकारको कामको प्रगति सुनाउँदै प्रधानमन्त्री केपी शर्मा ओलीले एक वर्षको अवधिमा खाली भाँडो आधार भरिएको जिकिर गरिरहेका बेला प्रमुख प्रतिपक्षी दल नेपाली कांग्रेसले भने सरकारले सपनामात्र बाँडेको आरोप लगाएको छ । कांगेसका बरिष्ठ नेता रामचन्द्र पौडेलले सरकारले आफ्ना कमजोरी ढाकछोप गर्दै सपनामात्र बाँडेको भन्दै सरकारको आलोचना गरे ।

त्यस्तै आलुमुनि १८ किलो सुन शीर्षकमा अर्को समाचार प्रकाशित भएको छ । निर्मला हत्याकाण्ड छानबिन गर्न महेन्द्रनगर पुगेको केन्द्रीय अनुसन्धान व्युरो (सीआईबी)का एसपी नेतृत्वको टोलीले कञ्चनपुरको पुनर्वासमा आलुको थुप्रोमुनि लुकाइराखेको अवस्थामा १८ किलो सुन बरामद गरेको छ ।

त्यस्तै अमेरिकामा नेपालीको माग–‘नलखेट’ शीर्षकको समाचारमा अध्यागमनसम्बन्धी अस्थायी व्यव्था टेम्पोररी प्रोटेक्टेड स्टाटस (टीटीएस)को समय थप्न माग गर्दै अमेरिकामा रहेका नेपालीले प्रर्दशन गरेको समाचार छापेको छ ।

‘दुईतिहाईको एक वर्ष’ शीर्षकमा छापिएको सम्पादकीयमा नागरिकले वाम गठबन्धनलाई पाँच वर्षका लागि राजनीतिक अस्थिरताको सिकार बन्न नपरोस भन्ने अभिमतसहित दिएको मतलाई सरकारले महसुस गरेर काम गर्न नसकेको उल्लेख गरेको छ ।