यङ्गून– भारी वर्षासँगै बाढी र डुबानका कारण म्यान्मारमा हजारौं विस्थापित भएका छन् ।

भारी मनसुनी वर्षाका कारण म्यान्मारको इरावादी र चिण्डविन नदीमा पानीको सतह बढेर वस्तीहरु डुबानमा परेकाले १८ हजारभन्दा धेरै मानिसहरु विस्थापित भएका हुन् । म्यान्मारको कचिन राज्य सबैभन्दा बढी प्रभावित भएको बताइएको छ । कचिन राज्यमा मात्र १४ हजारभन्दा धेरै विस्थापित भएका छन् ।

त्यस्तै, नजिकको रखायन राज्यमा पनि डुबानबाट ३ हजारभन्दा धेरै मानिसहरु विस्थापित भएको बताइएको छ । रखायन राज्यमा विद्रोही र सुरक्षाफौजबीच जारी हिंसात्मक घटनाबाट विस्थापित भएका मानिसहरु पछिल्लो डुबानबाट पीडित बनेको अन्तर्राष्ट्रिय सञ्चारमाध्यमले जनाएका छन् ।

विस्थापितको उद्धार र राहतका लागि सुरक्षाकर्मी र उद्धारकर्मीहरु परिचालन गरिएको अधिकारीले जनाएका छन् । म्यान्मारले ती क्षेत्रमा अन्तर्राष्ट्रिय सहायता संस्था तथा सञ्चारकर्मीलाई जान प्रतिबन्ध लगाएका कारण घटनाको यकिन तथा विस्तृत विवरण सार्वजनिक नभइसकेको बताइएको छ ।